Programi i Integruar i Ciklit të Dytë në Stomatologji ofron një përgatitje të plotë profesionale të stomatologëve të ardhshëm, mbështetur në përvojat më të mira kombëtare e ndërkombëtare të mjekësisë dhe të dentistrisë. Ai është i strukturuar për të integruar teorinë, trajnimin praktik dhe kujdesin ndaj pacientit dhe e vë theksin tek praktika e bazuar në prova, duke i përgatitur studentët për përparimet më të fundit në fushën e stomatologjisë. Programi përfshin gjithashtu mësimin dhe bashkëpunimin ndërprofesional, ku studentët e stomatologjisë bashkëpunojnë me studentë të mjekësisë, farmacisë dhe infermierisë për të rritur kujdesin ndaj pacientit. Ky program studimi u mundëson të diplomuarve të integrohen lehtësisht në kulturën stomatologjike europiane, të punojnë si profesionistë të licensuar në klinika stomatologjike private e publike, në sektorët e prodhimit e reklamimit të pajisjeve stomatologjike, në qendra spitalore të çdo niveli dhe institucione qendrore të shëndetit publik. Njëkohësisht, nëpërmjet këtij formimi ata kanë mundësi të punojnë në qendra kërkimore të profilit akademik, si dhe në institucione të ndryshme akademike brenda e jashtë vendit.